అమ్మ

అమ్మ
వంట ఇంటిలోన అమ్మ ఉంటుంది
ఎప్పుడూ ఎదో ఒకటి చేస్తూ ఉంటుంది

నిదుర లేచింది మొదలు
నిదుర పోయేంత వరకు
వంట ఇంటిపైనే ఆమె ధ్యాసంతా

ఉదయాన్నే ...
పాలు కాచాలంటుంది
కాఫీ కలపాలంటుంది
వంటింటికేసి వడివడిగా అడుగులేస్తుంది

వేడి వేడి దోశలు రెడీ అంటుంది
వాటికి కమ్మని చట్నీ జత చేస్తుంది

ఆపై,
ఘుమఘుమల వంటకాలు చేస్తుంది
తిన్నాక నిద్ర ముంచుకొస్తుంది

సంధ్య వేళ నిద్ర లేచేసరికి ...
వంట ఇంటిలోన అమ్మ ఉంటుంది
ఎదో ఒకటి చేస్తూ ఉంటుంది

కాసేపు కూర్చో అమ్మా అంటే,
పప్పు రుబ్బాలంటుంది, కూర తరగాలంటుంది
వంట చేయాలంటుంది, వంటింటిలోనే ఉండిపోతుంది

వంటచేసి ఎరుగదు ఏనాడు ఆమె చిన్ననాడు
ఆలోటు తీర్చేందుకే కాబోలు
వంటిల్లు విడిచిరాలేదు ఈనాడు

వంట ఇల్లు ఆమె సామ్రాజ్యము
వంట ఇల్లే ఆమె సర్వస్వము

వంట ఇంటిలోన అమ్మ ఉంటుంది
ఎప్పుడూ ఎదో ఒకటి చేస్తూ ఉంటుంది

స్మృతి

నా స్మృతి పధంలోని ప్రతి మలుపులో
నీవే ఎదురై, అడ్డుపడుతుంటావు
ఏ పనీ చేయనీకుండా అడ్డుకుంటావు

నీకిది భావ్యమా అని అడుగుతుంటే,
అదోలా చూస్తావు నా కళ్ళలోకి . . . .
నన్ను తోసివేస్తావు నీ జ్ఞాపకాల అగాధాలలోకి.

ఇట్లు,

నేను

(నీ జ్ఞాపకాల అగాధాల లోతుల నుంచి)

వానకి ఓ వందనం

రెండు రోజులుగా,

జోరు జోరుగా వాన - హొరు హొరున వాన

ఊరంతా వాగులయ్యేంతగా వాన

వరదలా ఉప్పొంగిన వాన

వానా వానా, ముంచెత్తే వానా

చినుకు పడితే చాలు చిత్తడైపోయే మా ఊరిలోన

చెలరేగిపోయాతావెందుకే వానా

నెలల తరబడి ముఖం చాటేస్తావే వానా

ఆకలి మంటలు రగిలిస్తావే వానా

జాలి లేదా నీకు వానా

వస్తేనేమో,

వాగు వంకలు నింపి, నదుల గట్లు తెంపి

ఊళ్ళే మింగేస్తావు వానా - అంత ఆకలా నీకు వానా

నువ్వు లేకుంటే, తినగ మెతుకుండదే వానా
నువ్వు వస్తే, అడుగు బయటపెట్టే వీలుండదే వానా
ఇలా, అతి చేస్తావెందుకే మతిలేని దానా

నీ రూపు నాజూకు వానా, కానీ

నీకు హృదయమే లేదు కాబోలు వానా

(ఇలా అన్నానని ఏమీ అనుకోకే వానా ... మరి నిన్నా, ఈరోజు ఏక ధాటిగా కురిసి, నువ్వు మమ్మల్ని బాగా ఇబ్బంది పెట్టావుగా, అందుకని కోపమొచ్చి అలా రాసాను.)

ఇట్లు,

నీ నేను

హైదరాబాద్

Aug 9th, 2008

ఏమి మాయ చేసావో ...

నా గుండె సవ్వడి
నాలోని అలజడి
మునుపెన్నడు లేదిది
నాకంతా వింతగా ఉన్నది

ఎప్పుడు తూరుపు తెలవారిందో
ఎప్పుడు ఆకాశం నల్లరంగు పులుముకుందో

పగలేదో, రేయేదో
తెలియకనే రోజు గడిచిపోతున్నది
ఏమి మాయ చేసావో ...

నిద్దురలో కలలా కమ్ముకుంటావు
పగలైతే అంతా నీవై కనపడతావు
కల ఏదో, నిజమేదో తెలియకుండా చేసావు
నీతలపుల చినుకులలో నన్ను తడిపివేసావు

వయ్యారి జుట్టు

ప్రతి అమ్మాయి తన జుట్టు గురించి బహుశా ఇలాగే అనుకుంటుందేమో ...

నిగనిగల జుట్టు, నల్లని జుట్టు

వయ్యారాల జుట్టు, వగలుపోవు జుట్టు

*************************

నిద్దురలో మెత్తగా నా మోమును కౌగిలించుకునే జుట్టు

చిక్కుపడి చికాకు పెట్టు ఈ జుట్టు

*************************

తలస్నానం చేస్తే త్వరగా తడి ఆరని జుట్టు

తడిగా ముడి వేస్తే తలనొప్పి ఈ జుట్టు

***************************

అద్దం ముందు నిలబడి ముస్తాబు అయ్యేవేళ

ఈ అందం నావల్లనే అంటూ గుసగుసలాడు జుట్టు

********************************

మూడు పాయలు చేసి ముచ్చటగ జెడవేసుకొను జుట్టు

పూలు సిగలో తురుమ బహు సుందరం నాజుట్టు

********************************

జడగంటలు పెట్టుకుని సందడిగా తిరుగుతుంటే

'ఎవరీ అపరంజి బొమ్మ ' అని అందరూ అంటుంటే

మురిసి మురిపెంగా నేను ముద్దు చేయు నా జుట్టు

**********************************

చిరుగాలితో సయ్యాట ఈ జుట్టు
నా నడకతో నాట్యమాడు నా జుట్టు

*********************************
నిగనిగల జుట్టు, నల్లని జుట్టు

వయ్యారాల జుట్టు, వగలుపోవు నాజుట్టు

---------------------------------------------

Photoes: Courtesy - Baapu garu

పుడమి

ఈ ప్రపంచమంతా నీ ఒడి

ఏమని వర్ణించను నీ ఒరవడి

విశ్వంలో మానవ జాతికి నీవే దిక్కు

నువ్వు కాదంటే మాకు పెద్ద చిక్కు

ఏ తల్లి కన్నదో, ఎవ్వరిమో మేము

ఏ ఆత్మ లోకాలనుండి వచ్చామో

ఏ అనంత దూరాలకి పోతామో, కానీ

నీ ఆదరణ మాత్రం మరువలేనిది

నీ పైకి రావడం జననం

నిను విడిచి పోవటం మరణం

ఆఫీసు జీవితం - 5 ముఖ్యమైన అనుభూతులు

ముందుమాట: ఇది సాఫ్ట్ వేర్ కంపెనీలో పనిచేసే ఒక ఉద్యోగి మనసులో మాట

ఆఫీసు జీవితం అంటే,

* ఆఫీసు నుండి 6 గంటలకు ముందే బయటపడితే పరమానందంగాను, 6 గం" కు బయటపడితే హాయిగాను, ఆతర్వాత ఆలస్యమైన ప్రతినిమిషం చిరాకుగాను అనిపించడం

* పని లేనప్పుడు ఉత్సాహంగాను, బాగా పని ఉన్నప్పుడు నీరసంగా అనిపించడం

* మేనేజరుకి దూరంగా కూర్చుంటే హాయిగాను, మేనేజరు క్యూబికల్ కి దగ్గరగా కూర్చోవాల్సి వచ్చినప్పుడు ఇబ్బందిగాను అనిపించడం

* జీతం పెంచినప్పుడు సంతోషంగాను, మేనేజరు తిట్టినప్పుడు విరక్తిగాను అనిపించడం

* పని చేసేటప్పుడు కాలం భారంగా కదులుతున్నట్టు, వారాంతపు సెలవులలో గబగబా పరిగెడుతున్నట్టు అనిపించడం