ఏమి మాయ చేసావో ...

నా గుండె సవ్వడి
నాలోని అలజడి
మునుపెన్నడు లేదిది
నాకంతా వింతగా ఉన్నది

ఎప్పుడు తూరుపు తెలవారిందో
ఎప్పుడు ఆకాశం నల్లరంగు పులుముకుందో

పగలేదో, రేయేదో
తెలియకనే రోజు గడిచిపోతున్నది
ఏమి మాయ చేసావో ...

నిద్దురలో కలలా కమ్ముకుంటావు
పగలైతే అంతా నీవై కనపడతావు
కల ఏదో, నిజమేదో తెలియకుండా చేసావు
నీతలపుల చినుకులలో నన్ను తడిపివేసావు

వయ్యారి జుట్టు

ప్రతి అమ్మాయి తన జుట్టు గురించి బహుశా ఇలాగే అనుకుంటుందేమో ...

నిగనిగల జుట్టు, నల్లని జుట్టు

వయ్యారాల జుట్టు, వగలుపోవు జుట్టు

*************************

నిద్దురలో మెత్తగా నా మోమును కౌగిలించుకునే జుట్టు

చిక్కుపడి చికాకు పెట్టు ఈ జుట్టు

*************************

తలస్నానం చేస్తే త్వరగా తడి ఆరని జుట్టు

తడిగా ముడి వేస్తే తలనొప్పి ఈ జుట్టు

***************************

అద్దం ముందు నిలబడి ముస్తాబు అయ్యేవేళ

ఈ అందం నావల్లనే అంటూ గుసగుసలాడు జుట్టు

********************************

మూడు పాయలు చేసి ముచ్చటగ జెడవేసుకొను జుట్టు

పూలు సిగలో తురుమ బహు సుందరం నాజుట్టు

********************************

జడగంటలు పెట్టుకుని సందడిగా తిరుగుతుంటే

'ఎవరీ అపరంజి బొమ్మ ' అని అందరూ అంటుంటే

మురిసి మురిపెంగా నేను ముద్దు చేయు నా జుట్టు

**********************************

చిరుగాలితో సయ్యాట ఈ జుట్టు
నా నడకతో నాట్యమాడు నా జుట్టు

*********************************
నిగనిగల జుట్టు, నల్లని జుట్టు

వయ్యారాల జుట్టు, వగలుపోవు నాజుట్టు

---------------------------------------------

Photoes: Courtesy - Baapu garu

పుడమి

ఈ ప్రపంచమంతా నీ ఒడి

ఏమని వర్ణించను నీ ఒరవడి

విశ్వంలో మానవ జాతికి నీవే దిక్కు

నువ్వు కాదంటే మాకు పెద్ద చిక్కు

ఏ తల్లి కన్నదో, ఎవ్వరిమో మేము

ఏ ఆత్మ లోకాలనుండి వచ్చామో

ఏ అనంత దూరాలకి పోతామో, కానీ

నీ ఆదరణ మాత్రం మరువలేనిది

నీ పైకి రావడం జననం

నిను విడిచి పోవటం మరణం

హాయ్

హాయ్,

హాయ్ అంటూ పలకరిద్దాం, హాయ్

హాయ్ అంటూ పలకరిస్తే ఎంతో హాయి

హాయ్ హాయ్ హాయ్

హాయి హాయిగా హాయ్

వెనుతిరిగి చూసేది లేదోయి

మునుముందుకే సాగాలోయి

పాట

తల్లిపాడే జోల పాట

ప్రియురాలి ప్రేమ పాట

గాలివేసే ఈల పాట

ఆకాశాన హరివిల్లు పాట

వాన పాడే చినుకు పాట

మౌనం నా మనసు పాట

ప్రకృతీ...

ప్రకృతీ,
ఉదయించే సూర్యుడు నీ నుదుట కుంకుమబొట్టు
పచ్చని పైర్లు నీ చీరకట్టు

నీ నవ్వులే గాలి తెమ్మెరలు
పలకరింపులే వాన చినుకులు

నీ రుసరుసలు వడగాల్పులు
హుంకారాలు మేఘగర్జనలు

నీ నాట్యం నదీజలాల పరవళ్ళైతే
తాండవం మమ్ము ముంచ్చెత్తే వరదలు

మమ్మల్ని లాలిస్తావు, పాలిస్తావు
అన్నీ అందిస్తావు

మా అల్లర్లు భరిస్తావు
అపచారాలు సహిస్తావు

అప్పుడప్పుడు మాత్రం ఆగ్రహిస్తావు
నీదైన శైలిలో హెచ్చరిస్తావు
హద్దు మీరితే శిక్షిస్తావు

నీ శాంతం సుందర ప్రణయ చిత్రం
నీ క్రోధం ప్రళయాల ఘట్టం

వెలుగు రేఖలు వెళ్ళిపోయాక
రేయి చీకట్లు కమ్ముకున్నాక
మా దేశం వచ్చాడు చందమామ

మబ్బు తెరలను చీల్చుకుంటూ
మా ఊరు వచ్చాడు చందమామ
మా ఇంటికి వచ్చాడు మా చందమామ

చుక్కలని తెచ్చాడు చందమామ
మా ముంగిట ముగ్గులే వేసాడు చందమామ

ఊసులు చెప్పాడు చందమామ
హాయి ఊయల ఊపాడు చందమామ

పాటలు పాడాడు చందమామ
పొలం గట్లపైన ఆటలే ఆడాడు చందమామ

కొలనులో ఈదాడు చందమామ
కలువ పూవులు ఇచ్చాడు చందమామ

(మేము ఇద్దరం మంచి స్నేహితులం అయిపోయాము)

ఉషోదయం వేళ,
వేడి తాళలేను అన్నాడు చల్లని మామ
వెళ్ళొస్తాను అన్నాడు చందమామ
వెళ్ళి పోయాడు చందమామ