నీకోసం

నీకోసం నా మనసు ముంగిట
ప్రేమ కవితలు పూయించాను

నా మనోఫలకాన
నీరూపాన్ని మనోహరంగా చిత్రించాను

నా అంతరంగాన అణువణువులోన
నిన్ను నింపుకున్నాను

నాగుండె లోయలు ప్రతిధ్వనించేలా
నీపేరే పాటగా పాడుతున్నాను

నువ్వు వచ్చి జీవితాన వెలుగులు నింపుతావని
వేయికళ్ళతో ఆశగా ఎదురుచూస్తూ
ఇలా వాకిట నిలుచున్నాను

ఎదురుచూపు

సఖీ,

నీతో నేనడిచిన దారులలో
ఒంటరిగా పాదం అడుగుపడనీయదు
ఆగిపోదామంటే కాలం ఆగనీయదు

ఎంత వారిస్తున్నా
నా మనసు నిన్ను స్మరిస్తూనే ఉంటోంది
ఏ ఆలోచనైనా నీవైపుకే పరుగుతీస్తోంది

కోరిన వరమై మురిపిస్తావో
తీరని శాపమై వేధిస్తావో
నీ ఇష్టం

నెలలు సంవత్సరాలే కాదు
ఎన్ని జీవిత కాలాలైనా నీ జ్ఞాపకాలతో గడిపేస్తాను
ఎప్పటికీ నీకోసం ఎదురుచూస్తూనే ఉంటాను